Минск, 4 ноември 2011 (МИА) - Претседателот на Белорусија Александар Лукашенко денеска изјави дека НАТО постапи со Моамер Гадафи полошо отколку што на времето се однесувале фашистите, пренесоа руските медиуми.
-Беше извршена агресија, убиени беа шефовите на земјата, не само Моамер Гадафи. И како беше убиен. Да го застрелаа во борба, да се кажеше дека човекот загинал. Ама не, со помош на спец службите на НАТО го реализираа фаќањето на шефот на земјата, изјави Лукашенко за време на посетата на Гродненската област.
Тој забележа дека Гадафи бил подложен на малтретирање, навредување и мачење.
-Полошо отколку фашистите на времето, подвлече белорускиот лидер.
Лукашенко додаде дека НАТО го прекрши мандатот на Советот за безбедност, а ОН не е успеа да се спротивстави на тоа.
Тој ги обвини САД, Италија, Франција и Германија дека сакаат да ги присвојат замрзнатите 150 милијарди долари либиски сметки и изјави дека тоа што се случи во Либија е „вандализам на 21-иот век“.