Њујорк, 2 мај 2012 (МИА) - За човечката цивилизација 21. век ќе биде критичен период бидејќи се очекува до 2050 година бројот на жителите на Земјата да се зголеми од сегашните седум на 11 милијарди.
- Развиените држави ќе мораат да ја намалат потрошувачката, со цел да се помогне околу 1,3 милијарди најсиромашни луѓе да излезат од длабоката сиромаштија, оцени нобеловецот-биолог Џон Салстон, кој ја предводеше работната група која ја изработи студијата „Луѓето и планетите“.
Во студијата се наведува дека ќе биде потребно да се издвојат повеќе пари во фондовите за планирање семејство, како и за образование на луѓето.
Се заклучува и дека во истиот контекст треба да се набљудува зголемувањето на човечката популација и потрошувачка, доколку се има за цел воспоставување одржлив живот со истовремено спречувње на сиромаштијата.
Моментално, се нагласува во студијата, постои голема несогласност во потрошувачката и расположливите средства.
Прашањата кои се изнесени во студијата ќе бидат разгледани на конференцијата на ОН за одржлив развој, која следниот месец ќе се одржи во Рио де Женеиро.