Најмалку 20 лица убиени во судири меѓу будисти и муслимани во Мјанмар

Мејхтила, 22 март 2013 (МИА) - Најмалку 20 лица загинаа во дводневните судири меѓу будисти и муслимани во градот Мејхтила, централен Мјанмар, изјави опозициски пратеник.

Најмалку пет џамии биле опожарени од средата, кога избувна насилството, изјави пратеникот од опозициската „Национална лига за демократија“ Вин Хтеин.

- Нема знаци за нови насилства, но ситуацијата останува напната. Жителите на Мејхтила се затвориле во своите домови и не смеат да излезат на улица, рече тој.

Пожарите продолжуваат да беснеат, но гневни будистички жители и монаси им попречуваат на властите да го гаснат огнот во муслимански куќи.

Религиозното насилство пламна со нова сила откако минатата година во слични судири загинаа 200 лица во западната држава Рахин.